hindi ako titingin sa dalawang banyagang naglalakad sa Mabini, Ermita


Jenny B. Orillos

Lulan ako ng isang dyip
biyaheng Sta. Cruz 
katabi ng mamang kulay lupa 
ang makinis na balat
nang mapansin namin pareho
ang isang pares ng estranghero—
pareho silang matangkad,
mala-rosas ang balbuning balat,
kulay mais ang mahabang buhok,
naka-salawal at may bitbit sa likod
na backpack ang isa
at naka-sarong at sandalyas naman
ang kanyang kasama..
Sinundan sila ng tingin
ng ibang pasahero.
Sumigaw ang mama, “Hey, Joe!”

Napatingin ako sa aking paa.

 MUSIKERO

Pista na naman ng mga santo
Kaya’t maghapon kang maglalako ng musika 
mula sa lumang gitara, 
kinakalawang na silindro,
barumbadong tambol o takip ng kaldero.
Aawitin mo ang mga kantang 
di maririnig sa radyo
pagkat ito’y natutuhan mo lamang
mula sa gutom na tiyan.
Dinadasal mong sana’y
maantig man lamang 
ang tainga ng bawat makarinig
at ambunan ka ng kahit
ilang pirasong grasya.
Hindi mo alintana
ang saradong tarangkahan 
ng kanilang pagtitiwala.
Kapwa kayo hihingi ng tawad sa isa’t isa—
ikaw sa dala-dala mong abala,
sila sa kawalan ng kakayahang 
masuklian ang inaalok mong
hindi naman nila hiningi.
 
 
 
Main
Next